「注碼定輸贏」外傳(三) –「納得就納症候群」上

「注碼定輸贏」外傳(三) –「納得就納症候群」上

 

上集「注碼定輸贏」外傳 (二)，回答了網友S的提問：

最近檢視番自己過去幾年的交易紀錄，發現自己出出入入股市多年原來只係打個和。今日拜讀閣下「注碼定輸贏」外傳的文章，發現自己完全中哂入面所提及的問題。因為對自己做的決定冇自信，所以我每日會睇大量blog、財經資訊同forum「抄功課」，但越睇得多就越亂，買買賣賣完全無系統可言…

上集的建議，是避免加入新的測市指標，因為系統的變數越多，越難化解。然後應全力集中從交易單據，10次輸得最甘的交易中(指輸的金額，不是%)，找出跟money management有關的犯錯模式。當時提議過10條問題，作爲檢討的切入點。

5月20日收到網友S的兩封回郵。

首封電郵：

首封電郵：

吳兄：

非常感激你解答本人問題！

其實由今年開始，我每次買賣後都會紀錄番我做相關決定的原因。開頭我以為好多時係因為自己不守紀律，但讀完你的文章後發現仲有其他因素令交易出錯(我真係對某隻股情有獨鍾)。呢排我已經暫停交易，希望可以儘快搵出自己的犯錯模式。

最後都要講多句thank you!

網友S

第二封電郵：

你好！

睇番過往交易記錄，輸得最甘就係2009年時買賣牛熊証，兼向下溝，起碼輸咗本金的10%，自此之後我已經冇掂任何衍生工具。

正股輸得較甘係2011年，當時自己係一名偽價值投資者，自以為Mr. Market 錯咗，就死揸爛揸，結果某股輸左50%先止蝕，另外都有啲輸左3x% 左右，唯一慶幸就係止蝕後啲股繼續free fall，甚至停埋牌。

之後我就每隻股都定約10-15%止蝕，好彩都冇再輸大錢。

但問題亦開始出現，我對於止蝕非常敏感，每隻股都揸唔長。例如某股已有10%帳面利潤，一回番我就即刻止賺，後尾發現只係調整又唔會再買番，因為覺得現價比之前買入價高=貴、唔再抵買 (中哂你之前推介本「思考的藝術：52 個非受迫性思考錯誤」入面所講的思考錯誤) 。另外有啲股明明都帳面賺緊比較多的又唔set好止賺，例如我$5買入，目標$8，隻股去到$7.8開始回，到$7, $6.5, $6 我都冇止賺，最後可能平手離場甚至倒蝕！

所以由上年到而家賺錢的交易金額只係好細(相對整個組合)，以百分比計贏得最多反而係注碼較小的交易。今年有幾單交易，因為上述原因已經賺少好多好多。

………….

最後都要再次多謝你的建議！

網友S

[注：電郵有經過刪減及潤飾]

網友S的懊惱：唔止蝕輸五成？但過份敏感，就贏唔到大錢，震一震倉，買中股皇都無用。明明可以贏五成甚至更多，結果可能贏得5%甚至更少…


點解救？其實也不是太困難。只是又要借小弟與「自摸之達人」，在麻雀檯上交戰的「瘀事」來闡釋道理。

話說當日「麻雀聯賽」，打到季尾時，基本上是「一敗塗地」。季初時，打八圈大概可能輸一、二百，到季尾時，放低三、四百，甚至四圈輸一千都試過。輸完又輸，後來真的輸到終極無癮，斬手指戒打牌，只差點要跟「自摸之達人」絕交！

當年屢敗，自然「呻到樹葉都落埋」、「X到亞媽都唔認得」：「XXXX，真係好X黑仔！點可能次次都唔夠佢快架！」、「隻手真係臭架，食嗰隻牌就摸唔到，出銃嗰隻就摸到應一應！」

幾年後，苦心鑽研值搏率理論時，才無意地醒悟，當年打牌打到「一pat屎」，是因爲著名的心理病「納得就納症候群」作崇。

以下是「左傳」(全名：左穿右插投機者秘傳)對於「納得就納症候群」的記載：

患者：絕大部分是經歷過重大心理創傷的麻雀手或交易員。
病徵：焦慮，情緒起伏極大，聽覺變得異常靈敏(尤其是周遭雜音)，嚴重缺乏安全感。坐立不安，缺乏耐性，口中經常唸著：「以快打快」、「走得快好世界」、「最緊要轉身夠靈活」等口訣定驚。

當年自己患上「納得就納症候群」的原因，就是給「自摸之達人」的連環「十番攻勢」創傷心靈的後遺症。不斷出銃後，打牌的自信心益發下降。明明副牌幾靚，食七番甚至十番的機會頗大，由於怕出銃，「有得食變成無得食」，反再輸多256元，「都係唔好咁搏」，只會降低要求，甘心改做五番，甚至三番，但求快快食糊了事，減低出銃的風險。

當年自以為好醒，其實是蠢過「豬頭炳」。(還是那句，枉自己仲讀那麼多書…)牌做細啲，捨七(番)取五(番)，理論上是會快點食糊(但實際上另一回事，當中玄妙，容後解釋)，但「有辣有唔辣」！由於食五番，實收得48元，比七番的96元，少了一半。以往出銃1鋪十番，食3鋪七番就能追凸。但改爲專攻五番，萬一給「自摸之達人」逮個正著，就要食6鋪五番，「利潤」才能由負轉正！

察覺了小弟的心理變化，「自摸之達人」打牌時，神情更加輕鬆。雖然我理論上食糊的機會率，是提高了；但他出銃大牌的風險，進一步降低。5鋪牌中，只要能夠食出1鋪(即命中率爲20%)，都夠贏錢，心理壓力自然較輕，本來牌章已高我一截的「自摸之達人」，打牌時更加揮灑自如。例如副牌其實頗爛，或以奇兵取勝，打心理戰，「夾硬」擺出一副六章「清一色萬字對對糊」的格局(可能他總共只得五隻萬字)，自己就會嚇得主動棄糊，而時間就會變成他的朋友，我的敵人。很多時就是給他摸吓一隻，摸吓又一隻地「入章」，開局爛牌變十番。

又例如大家都是「九章落地」，互相搏牌時，自己的心理壓力會大N倍。由於我搏輸時，會輸到爆頭，壓力自然大過玩俄羅斯輪盤。「自摸之達人」中棍都唔太傷，咪只會當俾水槍指住個頭，「哦，瀨嘢噃！」，就算中招，只會笑咪咪地拿張紙巾出來，抹吓個頭，推牌打過下鋪。

局勢發展下去，一方自然信心澎湃，劍氣長江，出招法道，更刁更狠；連環得手，以血餵劍後，信心再上一層樓，劍勢更形霸道，一劍平天下之勢，「如轉圓石于千仞之山者」，越打越旺，贏到開巷。另一方卻左支右絀，顧得攻時，防守又出破綻；顧得守時，只能背水結陣，死命防守，盼耗至終局，連「輸少當贏」亦不可。久守必失，久輸必頽，自我懷疑，呻吟不絕，自信全失，肝火沖天，粗口不絕，鋪鋪「暴走」，引頸待鑿，一敗塗地，土崩瓦解，理所當然！死亡旋渦，斯之謂也。

往事追憶至今，問大家一個問題：「學打牌，當學小弟，或是『自摸之達人』呢？」答案已經呼之欲出吧！問題是炒股票不是打牌，打麻雀的心法，跟炒股票的心法，究竟有何關係呢？

答案：一理通，百理明，「以雀入股」，「雀道」化「股道」，實屬可能。興亡誰人定？盛衰豈無憑？智慧勝感覺，知識改命運。讓我們再一次借用新對沖基金之王達利奧(Ray Dalio)的獨門「麥樂雞」投資(及思考)心法(新讀者可以先參考舊文「周生生與達利奧」)，去拆解當中奧義。

還記得「麥樂雞」心法的六字口訣嗎？就是：「先拆細，後分析」。而所謂「先拆細」，意指分析的起手式，是先將任何事情，拆解成不同的組成部份(component parts)。

其實前述打麻雀的故事，如果閣下心水夠清的話，來來去去都是圍繞這三個因素：
(I)出銃時輸的番數；
(II)食糊時贏的番數；
(III)食糊、出銃的機會率。

(請好好記住這三個因素，因爲基本上以後的所有文章，都是從這三個因素出發，組合成爲無數策略。)

小弟輸到噴血的「長敗之形」組成部份：
輸時十番(256元)，贏時五番(48元)，就算有極高的食糊率(84.2%)，也只打和。

「自摸之達人」贏到開巷的「長勝之形」組成部份：
輸時五番(48元)，贏時十番(256元)，(因此)極低的食糊率(15.79%)，已足夠打和。

(計算打平百分率之法，容後交代。)

換句話說，「自摸之達人」牌章之精髓，不敗之因由，在於專注做十番大牌，只要出銃時輸的是「不入肉」的五番，久唔久食一鋪，已夠打和。人有六旺，勢不可擋時，九霄龍吟驚天勝，我若爲皇！

讓我們返回網友S 5月20日兩封電郵的提問，當中的關鍵資訊，可以大致歸納如下：

某股輸左50%先止蝕，另外都有啲輸左3x%，之後我就每隻股都定約10-15%止蝕；
某股已有10%帳面利潤，一回番我就即刻止賺 (由此推論利潤率應低於10%)；
所以由上年到而家賺錢的交易金額只係好細。

正如前述：一理通，百理明，｢以雀入股｣，｢雀道｣可化｢股道｣。以雀爲喻，網友S的牌風實爲：
(I)出銃時：輸10-15%；
(II)食糊時：贏少於10%；
(III)結果：微賺。

事到如今，問題的核心及解決辦法，漸有水落石出之狀。

症初斷，怎根治？文太長，手太痛，下期續。

吳瑞麟

http://investhof.blogspot.hk

(聯絡電郵: lifeislonggamma@gmail.com)