【信報】唔識睇市反而發達 (二)

繼續解釋「唔識睇市、反而發達」的道理。

常人多以為投資宗師，發達皆因測市準。但高手自我剖析，傲登絕頂之因，卻另有玄妙。索羅斯誨 曰：「啱定錯，好閒。炒賣奧義，在乎啱時執幾多，錯時放低幾多。」股神拍檔蒙格勸曰：「上天並沒有賜予人類何時何地，都能看通萬事的本領…… 股市錯價只屬偶然，一生找出千次，只屬虛妄。贏家下注，例必嚴謹至極。」股神本尊開示：「當一生只能投資廿次，心思極慮，表現必然躍進。巴郡 （BRK.A）絕大部分贏的錢，都是由最好的十個機會贏回來的。」

之前介紹過的，保爾森、「霹靂火」艾斯曼和「獨眼龍」巴里，便是上述道理 的真人示範。次按危機，何時何地爆發，「鬼知咩？」後來搞到雷曼、貝爾斯登破產，更是「發夢都估唔到」（艾斯曼本人的基金，便是大摩打本。金融海嘯爆發 時，他哀鳴曰：「贏到開巷，但如果大摩執笠，華爾街全滅，咪又係得個吉？」）當日次按三雄實地調查，「阿豬阿狗」，無首期，都可以買五間大屋；那些按揭， 被打包為AAA級債券。而這些債券的信貸違約掉期，每年保金只收0.12％。

錯價如此，不賭身家，更待何時？至於「書生兄弟」，悟通期權莊 家，對非生即死的binary outcomes，仍以常價（即極賤價）賣出極價外認沽和認購期權。以骰寶為喻，中的機會是1／2，賠率是1中150。莊家派錢，不去「煲莊」，逆天而 行。遇良機若此，大市是牛是熊，指數是升是跌，再有何干？

至於接着介紹的塔雷伯（N. N Taleb），功力遠在次按三雄之上。如果次按三雄功力跟「笑傲江湖」令狐沖類似，塔雷伯便是今之獨孤求敗！其傳奇故事，要由1987年股災說起。

話說八十年代，塔雷伯喺瑞信第一波士頓，搞計量交易，簡稱「quant」。人做quant佢做quant，人哋硬揼model，佢就專門研究堆model嘅 破綻。塔氏發現，其實人人都係亂quant，風險嘅嘢，唔知唔見，咪當無事，繼續「壓土機前執麵包碎」。與其點醒一群蠢人，不如跟他們對賭。

他的戰法，是不估方向，總之樣樣資產，Eurodollar、德國馬克、日圓，甚至冷門如瑞郎兌澳紙、紐紙，都買啲極價外期權，call、put都殺。他深明期權所謂平貴，都是亂噏，總之成日輸少少，無關痛癢；只要一贏，就唔係人咁品。

買吓買吓，到1987年10月，塔雷伯去費城參加研討會，個個都話波幅已死。「無得玩嘞，央行玩哂！」（咁似而家嘅？）個市唔會郁，傻仔先買期權，等於倒錢落海。對家人多勢眾，自己立時灰哂。點知話口未完，10月19日，道指在毫無先兆下，單日狂插22％！

塔雷伯事後回憶：「當時贏到呆X咗，心生恐懼，竟打道回府，以瞓覺來定神。」

「百無一用是書生？」之三

(原載於信報財經DNA)